Malta fis-Sajf

Jekk tħoss li l-idea li tqatta' ġranet twal tixxemmex ħdejn il-baħar, tgawdi l-barbikjus filgħaxijiet jew tattendi festa ta' xi raħal mal-abitanti tal-lokal hija waħda estremament attraenti, allura bla dubju ser tkun għal qalbek f'Malta. Dejjem hemm xi ħaġa għaddejja fil-gżejjer Maltin, għalhekk, ma hemm ebda ċans li ser tixba' għax ma ssibx x'tagħmel jew li ħa jifdallek ħafna ħin f'idejk.

Billi tibbenifika mill-pożizzjoni tagħha, kennija bejn Sqallija u l-Afrika ta' Fuq, Malta tgawdi temperaturi sħan b'kondizzjonijiet ftit aktar friski permezz ta' żiffa ħafifa filgħaxijiet. Matul iż-żjara tiegħek f'Malta, li ta' spiss issir referenza għaliha bħala 'l-gżira tax-xemx', għandek iċ-ċans li tiltaqa' ma' festivals tal-jazz, festivals tal-birra, festivals tal-mużika, jiem iddedikati għaċ-ċinema, il-festi tal-irħula u ħafna aktar. Il-Maltin mhux biss jiċċelebraw kważi kollox, iżda jeħduha bħala sfida personali biex jieħdu vantaġġ sħiħ mill-ġranet tas-Sajf.

Ix-xhur sħan jiftħu l-istaġun tal-festi b'serje ta' avvenimenti li jibdew fl-aħħar ta' Mejju u jibqgħu sejrin bla waqfien sa Settembru. Matul dan il-perjodu tas-sena, qajla jasal tmiem il-ġimgħa u ma jkunx hemm xi raħal li jkun qiegħed jiċċelebra l-festa tal-qaddis patrun tiegħu. Waqt dawn il-festi, ser ikollok l-opportunità li dduq il-qubbajt tradizzjonali Malti – ħelu lokali delizzjuż li ħafna jixxennqu għalih.