Malta bit-tfal
Malta, li hija meqjusa bħala waħda mill-aktar pajjiżi siguri fid-dinja, hija l-aqwa destinazzjoni għal btala għall-familja kollha. B'bosta attrazzjonijiet u temp mill-aqwa, l-ippjanar tal-btala tiegħek f'Malta mal-familja u t-tfal żgur mhux ser iħallik nieqes mill-ideat u l-għażliet.
Għalkemm Malta hija rinomata l-aktar bħala destinazzjoni Sajfija, il-Gżejjer Maltin jippreżentaw varjetà ta' għażliet għad-divertiment tal-familji u t-tfal. It-tfal jirrikjedu ħafna attenzjoni u jistgħu jkunu xi ftit diffiċli, speċjalment waqt btala, u jekk għandek tfal ta' etajiet differenti, allura taf kemm jista' jkun diffiċli sabiex tikkuntenta lil kulħadd. Madankollu, tista' sserraħ moħħok li b'attivitajiet li jvarjaw minn waterslides sa żjara fil-kalzri tat-torturi, xiri ta' ħwejjeġ tal-aħħar moda sa paragliding, hi x'inhi l-età jew il-preferenza tiegħek, hemm xi ħaġa għal kulħadd.
Waħda mill-aktar attrazzjonijiet popolari fis-sajf hija l-iSplash and Fun Park. B'water-slides, żoni fejn jilagħbu t-tfal u l-akbar pixxina bil-mewġ fl-Ewropa, l-unika problema li ser ikollok hija meta tiġu biex titilqu. Maġenb dan il-park eżatt, hemm il-Mediterraneo Marine Park, fejn it-tfal jistgħu jgħumu mad-dniefel u jgawdu l-ispettakli tal-foki.
Għal tfal li huma iżgħar, Popeye Village huwa ideali. Dan il-villaġġ ta' fantasija, li oriġinarjament kien sett fejn inħadem u nġibed il-film ta' Popeye fl-1980, huwa komplut b'dgħajjes tas-sajd pittoreski u bi djar antiki tas-sajjieda, kollox ambjentat taħt irdum wieqaf li jħares lejn il-baħar; iżda dan il-post joffri ferm aktar minn xenarju. Taħt il-villaġġ hemm bajja spettakolari b'baħar akkwamarin, slides u faċilitajiet ta' sport tal-baħar; filwaqt li fuq il-villaġġ, hemm fun-park għat-tfal ta' kull età, komplut b'ġinnasju fi stil ta' ġungla fuq żewġ sulari, rikbiet u divertiment ieħor. Il-bars u r-ristoranti huma post eċċellenti fejn tista' tieħu xi ħaġa tajba u tirrilassa, filwaqt li tisma' l-istejjer eċċitanti ta' telleriti mbaskta bix-xemx!
Mill-iMdina Dungeons sal-Malta Experience, dawra bid-dgħajsa sa Blue Grotto fiż-Żurrieq, Jeep Safaris, irkib taż-żwiemel u esperjenzi prattiċi u diretti fis-sengħa tal-biedja, hemm ħafna u ħafna attivitajiet pjaċevoli li permezz tagħhom it-tfal jistgħu jiddevertu u jedukaw ruħhom. Jekk dan kollu ma jirnexxix, vjaġġ sal-Blue Lagoon ta' Kemmuna għandu jkun esperjenza maġika għal kulħadd. Din il-bajja blu u ċara daqs il-kristall li tifred liż-żewġ gżejjer (Kemmuna u Kemmunett) għandha tassew biex tkun kburija, minħabba li għandha fost l-aktar baħar sabiħ għall-għawm fl-arċipelagu; sempliċiment kun żgur li tieħu miegħek biżżejjed krema għal kontra l-qilla tax-xemx.
Il-kosta fit-tramuntana ta' Malta hija perfetta għat-tfal żgħar li jieħdu gost iċafċfu u jgħumu fil-ħafna bajjiet tar-ramel, li ħafna minnhom għandhom faċilitajiet ta' gwardji tal-kosta matul ix-xhur tas-Sajf.
