Btajjel Romantiċi

Intom koppja u qegħdin tfittxu l-btala romantika perfetta għat-tnejn li intom weħidkom? Minn bajjiet eżotiċi sal-isfond romantiku tal-Port il-Kbir, Malta hija mimlija b'sigrieti u misteri li qegħdin jistennew li jiġu esplorati.

Jekk tieħu gost iddur il-mużewijiet, il-wirjiet tal-arti u tara l-arkitettura barokka, mela allura l-Belt Valletta għandha dan kollu u ħafna aktar. Din il-belt maestuża, li hija mimlija postijiet b'veduti intensi, ġonna trankwilli u storja mimlija daqs bajda dwar ir-ruħ ta' din il-belt storika, bla dubju tgħin sabiex toħloq l-isfond u l-burdata għal ikla romantika f'waħda mit-toroq dojoq tagħha taħt id-dawl tal-qamar. Hawnhekk għandek issib xelta wiesgħa ta' ħwienet tal-inbid f'bini medjevali, ristoranti lussużi u moderni jħarsu lejn il-pjazez imdawlin u saħansitra ammont ġmielu ta' ristoranti aktar imwarrbin, li ġeneralment ikunu ppakkjati b'Maltin li tassew huma dilettanti tal-ikel.

Jekk tixtieq tirrilassa permezz ta' btala trankwilla fi spa, Tas-Sliema għandha bosta spas u lukandi ta' ħames stilel fejn tista' tistrieħ u terġa' ssib lilek innifsek. Bi ħwienet tax-xorb eleganti u ristoranti li jservu ikel fin, kollha max-xatt u qrib ħafna ta' xulxin, tista' tqatta' aktar ħin mal-maħbub jew maħbuba tiegħek tippassiġġaw tul il-promenade ta' din il-lokalità turistika.

Min-naħa tagħha, il-gżira Għawdxija ma tagħmilx għajb lill-oħtha Malta, billi hija wkoll għandha ħafna x'toffri. B'ammont imdaqqas ta' lukandi ta' ħames stilel u rziezet lussużi, tista' taħrab mill-istorbju u l-ġenn ta' Malta sabiex tirrilassa u tistrieħ fil-kampanja Għawdxija. Il-gżira hija rinomata għall-effett ta' kalma u rilassament li tħalli fuq dawk li jogħġobhom iżuruha, tant li bħal donnha tneħħilhom is-snin minn fuqhom.

Għal dawk fostkom li huma xi ftit aktar estravaganti, huwa faċli li wieħed jirkeb fuq jott u jaħrab ħarba sal-blue lagoon jew lejn xi port ieħor f'Malta. Tista' tirkeb fuq waħda mid-dgħajjes tal-passiġġieri li jitilqu mix-xatt ta' Tas-Sliema u tul il-Port il-Kbir. Dawk li huma saħansitra aktar avventurużi jistgħu jikru dgħajjes bil-qlugħ jew speedboats u jsuquhom huma stess.

Kemm jekk waqt inżul ix-xemx fl-Imdina, ikla romantika fil-Bajja ta' Spinola jew barbikju filgħaxija fuq bajja ramlija, tista' taċċerta ruħek li l-Gżejjer Maltin mhumiex ser jiddiżappuntawk.