It-tlett Ibliet
few clouds 22.51 °C

It-tlett ibliet iffortifikati magħrufa bħala t-Tlett Ibliet (il-Kottonera) - il-Birgu, Bormla u l-Isla - li jinsabu madwar il-Port il-Kbir fin-Nofsinhar ta' Malta, joffru daqqa ta' għajn affaxxinanti lejn l-istorja marittima ta' Malta.

location_city
local_activity
photo_camera

L-istorja tat-Tlett Ibliet, li hija kkaratterizzata mill-Kavallieri ta' San Ġwann, knejjes, palazzi grandjużi u swar imponenti tista' forsi titqies bħala rikka daqs dik tal-kapitali ta' Malta, il-Belt Valletta.

Matul dawn l-aħħar snin, dan ir-reġjun, li tabilħaqq għandu l-post li jixraqlu fl-istorja estensiva ta' Malta, kien għaddej minn qawmien mill-ġdid fil-popolarità. It-Tlett Ibliet issa huma mimlija b'ristoranti esklussivi, ħwienet tal-inbid, mużewijiet u marina tal-jottijiet, li jagħmluhom postijiet attraenti ħafna għal investiment fil-proprjetà.

Din ir-rokna tal-gżira tara ċelebrazzjonijiet ta' festi reliġjużi u festi oħrajn matul is-sena kollha. Fi żmien l-Għid, isiru l-ġirjiet tradizzjonali bl-istatwi ta' Kristu Rxoxt tul it-toroq iffollati ta' dawn l-ibliet, li joffru lit-turisti intuwizzjoni u esperjenza personali tal-kultura u t-twemmin reliġjuż tal-Gżejjer Maltin.

Kull belt għandha l-faxxinu u l-karattru partikolari tagħha li jiddistingwuha mil-lokalitajiet l-oħrajn tal-gżejjer. Il-Birgu jospita ħafna residenzi rinomati tal-kavallieri, kif ukoll il-Mużew Marittimu, il-mużew tal-folklor u l-Palazz tal-Inkwiżitur. Din il-belt tilqa' fi ħdanha wkoll diversi artefatti u relikwi tal-Kavallieri ta' San Ġwann.

Min-naħa tagħha, Bormla għandha Knisja Parrokkjali impressjonanti b'Oratorju mimli xogħlijiet ta' arti, filwaqt li l-Isla għandha żewġ knejjes meraviljużi li huma ddedikati lil San Filep u lill-Madonna tal-Vitorja.

Affaxxina ruħek bis-sbuħija tar-rappreżentazzjonijiet ta' ġrajjiet tal-imgħoddi u tal-iljieli għad-dawl tax-xemgħa hekk kif dawn imexxuk minn triq għall-oħra. Isiru vjaġġi regolari bil-karozzi tal-linja lejn it-Tlett Ibliet mill-Belt Valletta u dawn il-bliet huma aċċessibbli faċilment ukoll bil-karozza jew b'laneċ li jitilqu mix-xatt tal-Belt Valletta.

1