Il-Palazzi tal-Belt Valletta
Il-Belt Valletta hija belt glorjuża u impressjonanti b'arkitettura rikka. F'kull rokna tagħha, dawk kollha li jżuruha jiltaqgħu wiċċ imb'wiċċ ma' kapolavuri u ġojjelli tal-arkitettura; iżda huma l-palazzi li jgawdu pożizzjoni prominenti f'din il-belt maestuża.
L-aktar magħruf fost dawn il-palazzi huwa l-Palazz tal-Gran Mastru, li ġie ddisinjat mill-arkitett rinomat Malti Ġlormu Cassar. Dan il-palazz lussuż kien jintuża bħala r-residenza uffiċjali tal-Gran Mastri suċċessivi. Illum il-ġurnata, huwa jinkludi l-Kamra tar-Rappreżentanti u l-Uffiċċju tal-President ta' Malta, kif ukoll l-Armerija tal-Palazz, li tikkonsisti f'kollezzjoni unika ta' armi medjevali u lbies ornamentali tal-gwerra.
Il-Berġa ta' Kastilja, li tinsab fuq l-ogħla ponta tal-Belt Valletta qrib id-daħla tagħha, hija bini impressjonanti tal-era Barokka. Dan il-bini, li oriġinarjament kien il-berġa għal-Lingwi ta' Kastilja, León u l-Portugall, issa jservi bħala l-uffiċċju tal-Prim Ministru. Kuntrarju għal palazzi oħrajn li nsibu fil-belt, il-Berġa ta' Kastilja għandha turġien kbar u wesgħin fid-daħla tagħha, li jkomplu jagħtuha dehra imponenti. Il-faċċata sabiħa ta' dan il-bini, li ġiet irrestawrata dan l-aħħar, taqbel mad-dekor Barokk daqstant ieħor impressjonanti li għandha fuq ġewwa.
Il-Berġa ta' Provence, li tinsab fi Triq ir-Repubblika, tospita l-Mużew Nazzjonali tal-Arkeoloġija. Dan il-bini, li ġie ddisinjat ukoll minn Ġlormu Cassar, għandu struttura impressjonanti li tinkludi Sala kbira u lussuża.
Il-Berġa tal-Italja hija eżempju eċċellenti ieħor ta' berġa li ġiet iddisinjata minn Ġlormu Cassar. Fil-preżent, hija tospita l-Awtorità Maltija tat-Turiżmu u tintuża wkoll għall-esebizzjonijiet. Dan il-bini għandu stemma araldika impressjonanti tal-ġebel fuq il-faċċata tiegħu.
Casa Rocca Piccola hija binja unika, fis-sens li hija proprjetà privata u fiha għadhom jgħixu n-nies. Madankollu, hija tkun miftuħa għall-pubbliku f'ħinijiet speċifiċi matul il-ġurnata. It-tur jinkludi aktar minn 12-il kamra mżejna b'mod lussuż, ġonna mdawrin bil-ħitan u netwerk taħt l-art ta' passaġġi u xelters li kienu jintużaw fi żmien il-gwerra.
Palazzi oħrajn li ċertament ta' min iżurhom jinkludu l-Berġa ta' Aragona, il-Berġa tal-Baviera, Palazzo Ferreria u Palazzo Castellania.