Żmien il-Milied f'Malta

Il-Milied huwa għal qalbna ħafna! Aħna niċċelebraw iż-żmien maġiku tal-Milied b'serje ta' avvenimenti li huma addattati ħafna għal dan il-perjodu speċjali u ferrieħi. Billi Malta hija nazzjon bi predominanza Kattolika, il-Quddiesa tradizzjonali ta' Nofs il-Lejl, li ssir f'kull lokalità, hija funzjoni reliġjuża li hija mnaqqxa fil-kultura Maltija.

It-toroq armati bit-tiżjin u d-dwal tal-Milied u l-għanjiet ferrieħa tal-Milied li joħorġu mill-ispikers jgħinuk tidħol fl-ispirtu festiv ta' dan iż-żmien.

Fil-Kon-Katidral ta' San Ġwann fil-Belt Valletta jittella' servizz speċjali li jkun komplut bil-kant tal-għanjiet tal-Milied fid-dawl tax-xemgħa. Matul iż-żmien tal-avvent, bosta parroċċi madwar il-gżejjer jiġu ttrasformati b'mod pjaċevoli bil-fjuri u l-presepji tan-natività li jżejnuhom. L-altari jiżżejnu bil-fjuri, filwaqt li l-ħitan u l-kolonni jintramaw b'damask aħmar li jagħti dehra mill-isbaħ. Il-knejjes kollha għandhom kalendarju ta' avvenimenti li jvarjaw minn purċissjonijiet għall-kant tal-għanjiet tal-Milied mit-tfal.

Matul dan iż-żmien stenna wkoll l-ikel, ħafna u ħafna ikel tajjeb, karatteristika tipika tal-kultura Maltija. Żmien il-Milied jara ristoranti rinomati jeċċellaw f'dak li jispeċjalizzaw fih billi jippreżentawlek taħlita diversa ta' platti tradizzjonali Maltin mill-aktar delizzjużi. Tinsiex id-dwal!! Id-dwal issibhom kullimkien, iteptpu fit-twieqi tad-djar Maltin, fit-toroq u tista' tgħid kullimkien - aħna ndendlu d-dwal kull fejn nistgħu.

Iżda ejja ma nintilfux biss fit-tlellix u ninjoraw it-tradizzjonijiet reliġjużi u l-folklor - li tabilħaqq jiġu ċċelebrati u mmanifestati bil-kbir f'aktar minn 460 knisja madwar Malta u Għawdex. Jekk dan mhuwiex biżżejjed, stenna li tara wkoll xeni ħajjin tan-natività kompluti bil-baqra u l-ħmara.

Fl-aħħarnett, ma nistgħux ninsew insemmu l-pantomima tal-Milied, li tkun mistennija ħafna mill-Maltin u li għaliha jattendu bi ħġarhom. Din il-produzzjoni teatrali speċifika tittella' f'diversi lokalitajiet madwar Malta u Għawdex, bl-aktar waħda popolari ssir bejn il-ħitan maestużi tat-Teatru Manoel fil-Belt Valletta.

Bl-attivitajiet kollha li tista' tagħmel u l-minjiera ta' affarijiet li għandek x'tara, l-unika problema li ser ikollok hija li tipprova tattendi kulma inkludejt fl-iskeda tiegħek.